الأكل بالنقاب رااااااااءع

اولا كده هتقيمى هتبقى صحبتى وحبيبتى وكفاءه يلا

بداية انا عايزة اوضح للبنات اللى هترد على موضوعى وتقولى اننا مش بناكل بره او بنطلب احسن فى البيت
فأكيد هييجى يوم وتتزنقى وتضطرى تاكلى بره او حد يعزمكم او حتى زوجك خرجك خروجة تمام واتأخرتوا بره
يعنى اكيد هتتعرضى لموقف زى ده ..

وانتوا عارفيين ان مصر مافيهاش مطاعم كتير للمنتقبات واللى موجود مش معروف اوى.

فأنا حاولت على قد مااقدر اجمعلكم كل افكارى واقولكم اتصرفت ازاى فى مواقف قابلتنى والحمد لله النقاب مامثليش اى عقبة بفضل الله .

تابعونى يا قمرات ونبتدى مع بعض ..

---

ا - خلى فى شنطتك دايماً شاليموهات
انا بشترى كيس كبير من اى بتاع منظفات او بلاستيكات وبيقعد معايا كتير اوى ومش غالى خالص ب 4 جنيه تقريباً
وده عشان تشربى ميه او عصير براحتك خالص من غير ماالنقاب يترفع
شوفوا الصورة دى بتشرب كانز بشيلموه ومافيش اى مشكلة

2 - لو زوجك اللى عازمك حاولى تاكلى فى مكان الاكل فيه ساندويتشات
وطبعاً ده سهل جداً ومتوافر فى فى مكان .. وكده هتدخلى الساندويتش وتاكلى براحتك
وانا عن نفسى النقاب مريحنى جداً جداً فى النقطة دى لانى بتكسف آكل بره .

3 - لو معزومة على اكله سمك او اكل بشوكة وسكينه
برضة ولا يهمناااااا
انا عن نفسى بعمل ايه
عندى نقاب الشكل ده

اسمه نقاب يَمنى
وانا عن نفسى مسمياه نقاب الخطوبة

ليه بقى ؟

عشان لما ابقى عارفة ان الاكل ممكن يبهدل نقابى
او فى شوربة او كدة اروح رافعة نقابى الاساسى والبس النقاب ده
واكل براحتى وارجع ابدله
طبعاً فى فكرة افضل منه وهى النقاب اللى بيتقلب على وجهيين
لكن للاسف انا ماعرفتش اتوصل ليه فصرفت نفسى بقى .

4 - خلى فى شنطتك دايماً مناديل مبلله Wipes

اى نوع تحبيه وانا عن نفسى بستخدم ايزى كير جميل اوى
اظن فى الحدود من 5 ل 7

وده عشان لو النقاب اتبهدل منك تمسحيه بكل سهوله ومايسبش اى اثر .

5 - لفة النقاب نفسها ممكن تريحك
يعنى ابعدى تماماً عن النقاب القصير واللى عرضة قليل من الجانبين
لانك مجرد ماتحاولى تاكلى ممكن جداً وشك يبان
بصوا انا بربط نقابى بطريقتين
الأولى طرحة لف طويلة
والتانية ادخل النقاب جوا كاب او ملحفة
الطرحة زى الصورة دى
بجيب طرف الطرحة لما اجى اكل ومش بيبين اى حااااجة

وده الكاب الشيفون جميل اوى وبدخل النقاب جوه الكاب واكل او اشرب من جوه
وكذلك برضة الملحفة

6 - انصحكم نصيحة بالله عليكم ماترفعوا النقاب بره
لانك ماتضمنيش ممكن يكون حد شايفك وانتى مش واخدة بالك , وافتكرى دايماً انك بتنقلى صورة للنقاب .. ربنا يجعلنا يارب صورة مشرفة للنقاب .

7 - وانا بعمل سيرش لقيت بنات كاتبيين على مطاعم فيها اكشاك للعائلات وطبعاً بتكون مغلقة
وده اللينك اللى فيه الردود فشوفوه ان شاء الله يفيدكم
عاوزة مطعم عائلات ينفع المنتقبات في القاهرة الكبرى .

8 - لكل اللى ممكن تشوف الموضوع كبير وليه كل ده ونقعد فى بيتنا احسن
هقولكم والله انا منتقبه وبنزل كتير لجامعتى والحمد لله بعمل كل حاجة من غير اى قلق
ولما بنزل مع زوجى ببقى فرحانه اوى والنقاب مش عاملنا اى مشكلة بفضل الله
والحمد لله بتفسح واخرج واعيش حياتى .. امال يعنى المنتقبات ضاربين بوز ؟! .

9 - ربنا يهدينا و يثبتنا جميعاً يارب والجنه تمنها غالى اوى يا بنات .. خلى حجابك لله وان غرضك منه الستر عشان تاخدى ثوابه .. وارجوكم ماحدش يدخل يقولى النقاب مش فرض والكلام ده انا عارضة حلول لمشكلة .. وبلاش الردود بتاعه لا تعليق دى ربنا يكرمكم . انى احبكم فى الله جميعاً
وحبيت افيدكم بتجربتى ومنتظرة ارائكم عشان اجمعها واضيفها فى اول مشاركة عشان كلنا نستفاد
و مستنياكم تقولولى بتاكلوا بره ازاى يا بنات