ملمع شفاه طبيعي من صنع إيدك

تمتعي بشفاه صحية وجميلة

ملمع الشفاه عنصر أساسي في مجموعة الماكياج الخاصة بأي بنت، حتى لو كانت مش بتستخدم الماكياج بشكل دائم، لأنه بيضيف لمسة فيها صحة ونضارة وجمال طبيعي على الشفاه.

النهارده هنقول لك إزاي تعملي ملمع للشفاه بنفسك في البيت طبيعي، علشان تحصلي في النهاية على شفاه جميلة وصحية بمكونات طبيعية 100%..

ملمع شفاه بمكونات طبيعية
المقادير:
- ملعقة صغيرة خلاصة صبار
- ½ ملعقة صغيرة زيت جوز هند
- 1/8 ملعقة صغيرة زيت فيتامين E (هتلاقيه عند العطار)
- أي زيت عطري تحبّي ريحته (فانيليا، روزماري، ورد، نعناع، ليمون)

ملحوظة:
يفضل إنك تحصلي على خلاصة الصبار بشكل طبيعي، بإنك تجيبي ورقة صبار وتفتحيها من النصف، وتاخدي الجل اللي بيكون موجود جواها، وتستخدميه.

الطريقة:
اخلطي كل المكونات دي مع بعضها ما عدا الزيت العطري، وقلّبيهم مع بعض، لغاية ما يتجانسوا تماما مع بعض، وفي الآخر ضيفي نقطة أو نقطتين من الزيت العطري اللي اخترتيه، وبعد كده حطّيه في أي علبة زجاجية، واستخدمي منه عند الحاجة، وتقدري تعملي منه كميات كبيرة وتهادي منها صديقاتك.